Home Ragam BALADA SABOH RASA

BALADA SABOH RASA

449

 

Oleh Lisa Ulfa

Seureng bak lidah ceudah ulon kheun
Ruman Cut buleun bit han bandeng sa
Teulumpoe sabe teupike tip jeum
Jeumpa sikureung meu nak po jeumba

Teukedi jioh hantroh ngon rinyeun
Jeut lon ek cabeung ngon gaki dua
Han dek ngon runong bungong lon yak tueng
Takot jeut ruhung asoe teuh luka

Lon karang lagu hai meulu di leun
Segoh troh reuneum lon jok keu Dinda
Bak angen lewat surat lon diyeung
Meuharap jangeun sampoe bak gata

Rihon meubareh gaseh pih meunyum
E dek puteh pleun adoe sigala
Sibu lon pupok beok tan kureung
Ulon peureumeun sipeunoh jiwa

Meucruk-cruk jitron ateuh on kuyuen
Teuga ie ujeun oeh malam jula
Lon eh han teungeut lon bleut lam tip jeum
Meugadang aduen kareuna cinta

Hate meuhajat sapat ngon bayeun
Sidroe peutumuen keu judo jiwa
Hajat lon neuk com kuntom ban ranum
Peuduek bak lumueng meusenda-senda

Namun nibak sang halang melinteung
Lumboi han sadum geutanyoe dua
Gata dek bintang lon tuan naleung
Inan jeut takheun mustahe sama

Beuthat lon hawa cahya lon ruguem
Ka pasti meutheun hai meuludiwa
Ban tamse putroe adoe nyang anggun
Sedang di aduen rakyat biasa

Han mungken sampoe adoe lon yak tueng
U gubok papeun meupuwoe gata
Hana dek bak lon pawon ngon parfum
Asoe lam baluem ngon ija sutra

Bahle lon keubah lam madah jangeun
Rasa sibideung sidroe pemuda
Bak laen alam lon tuan peutheun
Gaseh lon useung keu sidroe gata

LEAVE A REPLY

Please enter your comment!
Please enter your name here